bahaaron ke rangin zamane hain humse

bahāroñ ke rangīñ zamāne haiñ ham se

mohabbat ke saare fasāne haiñ ham se

hamāre bhī dam se baḌī raunaqeñ haiñ

salāmat tire bāda-ḳhāne haiñ ham se

jabīn-e-aqīdat kahāñ ḳham nahīñ hai

tumhāre tamām āstāne haiñ ham se

hamārī tabāhī pe ro.eñge ik din

unheñ bhī baḌe zaḳhm khāne haiñ ham se

baḌī saḳht hai zindagī kī vafā bhī

murattab anokhe fasāne haiñ ham se

javānī se sadme uThā.eñge ham bhī

javānī ko sadme uThāne haiñ ham se

bahāroñ kī nabzeñ haiñ mamnūn 'anjum'

chaman ham se haiñ āshiyāne haiñ ham se

bahaaron ke rangin zamane hain hum se

mohabbat ke sare fasane hain hum se

hamare bhi dam se baDi raunaqen hain

salamat tere baada-KHane hain hum se

jabin-e-aqidat kahan KHam nahin hai

tumhaare tamam aastane hain hum se

hamari tabahi pe roenge ek din

unhen bhi baDe zaKHm khane hain hum se

baDi saKHt hai zindagi ki wafa bhi

murattab anokhe fasane hain hum se

jawani se sadme uThaenge hum bhi

jawani ko sadme uThane hain hum se

bahaaron ki nabzen hain mamnun 'anjum'

chaman hum se hain aashiyane hain hum se