bahisht-zar hasin gul-kade mein rahte the

bahisht-zār hasīñ gul-kade meñ rahte the

ham ek saath kisī mintaqe meñ rahte the

na jaane kaun se pal kā thā intizār hameñ

na jaane kab se ham ik dūsre meñ rahte the

yahīñ kahīñ the pareshān ḳhvāb kī sūrat

kabhī to niiñd kabhī ratjage meñ rahte the

bahut sī jhīleñ tire chashm-o-lab se miltī thiiñ

bahut se peḌ mire rāste meñ rahte the

zamānoñ baa'd kahīñ sāmnā huā apnā

safar meñ the magar ik dā.ere meñ rahte the

kahīñ jagah hī nahīñ thī hameñ samāne ko

ham apnī zaat ke hairat-kade meñ rahte the

hamārī raushnī to ek thī vajūd alag

ki do charāġh the ik tāqche meñ rahte the

yaqīn jaan ki ik dūsre kā aks the ham

aur ek saath kisī ā.īne meñ rahte the

ajiib gosha-e-tanhā.ī meñ paḌā huā huuñ

tamām log kabhī rābte meñ rahte the

bahisht-zar hasin gul-kade mein rahte the

hum ek sath kisi mintaqe mein rahte the

na jaane kaun se pal ka tha intizar hamein

na jaane kab se hum ek dusre mein rahte the

yahin kahin the pareshan KHwab ki surat

kabhi to nind kabhi ratjage mein rahte the

bahut si jhilen tere chashm-o-lab se milti thin

bahut se peD mere raste mein rahte the

zamanon ba'd kahin samna hua apna

safar mein the magar ek daere mein rahte the

kahin jagah hi nahin thi hamein samane ko

hum apni zat ke hairat-kade mein rahte the

hamari raushni to ek thi wajud alag

ki do charagh the ek taqche mein rahte the

yaqin jaan ki ek dusre ka aks the hum

aur ek sath kisi aaine mein rahte the

ajib gosha-e-tanhai mein paDa hua hun

tamam log kabhi rabte mein rahte the