bahla raha hun dil ko ki gham moatabar nahin

bahlā rahā huuñ dil ko ki ġham mo'atabar nahīñ

maanā shab-e-hayāt mirī muḳhtasar nahīñ

vo kyā ga.e ki saarī masarrat liye ga.e

taskīn-e-dil nahīñ hai qarār-e-jigar nahīñ

mai-kash vahī haiñ bazm meñ jām-o-subū vahī

lekin vo dil-navāz kisī kī nazar nahīñ

ek musht-e-ḳhāk ke bhī barābar nahīñ hai vo

dil āshnā-e-dard-e-mohabbat agar nahīñ

dair-o-haram meñ shaiḳh-o-barahman haiñ fitna-sāz

mahfūz un ke shar se ḳhudā kā bhī ghar nahīñ

har phuul sīna-chāk hai har shāḳh sar-nigūñ

sehn-e-chaman meñ kaun hai jo nauhagar nahīñ

ham intizār-e-sub.h-e-bahārāñ kiye rahe

gulshan meñ apne aa.ī nasīm-e-sahar nahīñ

maiñ hī huuñ ek jānib-e-manzil ravāñ-davāñ

rāh-e-vafā meñ koī mirā ham-safar nahīñ

ġham-hā-e-rozgār naqīb-e-ḳhushī bhī haiñ

vo kaun sī hai shab jo amīn-e-sahar nahīñ

e.ajāz hai ye un kī mohabbat kā ai 'zakī'

maḳhfī mirī nazar se koī rahguzar nahīñ

bahla raha hun dil ko ki gham mo'atabar nahin

mana shab-e-hayat meri muKHtasar nahin

wo kya gae ki sari masarrat liye gae

taskin-e-dil nahin hai qarar-e-jigar nahin

mai-kash wahi hain bazm mein jam-o-subu wahi

lekin wo dil-nawaz kisi ki nazar nahin

ek musht-e-KHak ke bhi barabar nahin hai wo

dil aashna-e-dard-e-mohabbat agar nahin

dair-o-haram mein shaiKH-o-barahman hain fitna-saz

mahfuz un ke shar se KHuda ka bhi ghar nahin

har phul sina-chaak hai har shaKH sar-nigun

sehn-e-chaman mein kaun hai jo nauhagar nahin

hum intizar-e-subh-e-bahaaran kiye rahe

gulshan mein apne aai nasim-e-sahar nahin

main hi hun ek jaanib-e-manzil rawan-dawan

rah-e-wafa mein koi mera ham-safar nahin

gham-ha-e-rozgar naqib-e-KHushi bhi hain

wo kaun si hai shab jo amin-e-sahar nahin

eajaz hai ye un ki mohabbat ka ai 'zaki'

maKHfi meri nazar se koi rahguzar nahin