bahlaenge firaq mein dil ko fughan se hum

bahlā.eñge firāq meñ dil ko fuġhāñ se ham

taskīn pā.eñge to usī dāstāñ se ham

haiñ vus.at-e-ḳhayāl tirī ye ināyateñ

āzād ho ga.e haiñ jo qaid-e-makāñ se ham

phūloñ ke ās-pās the kāñTe bhī saiñkaḌoñ

māyūs-o-nā-murād phire gulsitāñ se ham

majbūrī-e-firāq ne ma.azūr kar diyā

laa.eñ ḳhayāl-e-zabt-e-mohabbat kahāñ se ham

phir vahshat-e-ḳhayāl ne āġhosh meñ liyā

ai ġhairat-e-shakeb chale ab yahāñ se ham

pūchhā jo us ne haal to ḳhāmosh ho ga.e

tashrīh-e-dard kar na sake kuchh zabāñ se ham

gir kar chaman ko barq ne tārāj kar diyā

nikle the kyā samajh ke abhī āshiyāñ se ham

jo kārvāñ thā vādī-e-ulfat meñ rahnumā

āḳhir bichhaḌ ke rah ga.e us kārvāñ se ham

uTThe jabīn-e-shauq ye amr-e-muhāl hai

kuchh faiz pā rahe haiñ tire āstāñ se ham

jalve kā eqtidār hai zauq-e-nigāh par

dekheñ kisī ke husn ko haT kar jahāñ se ham

barq-e-sharar-navāz bhī sharmā ke rah ga.ī

is bebasī ke saath chale āshiyāñ se ham

pahuñchā na koshishoñ pe kisī kā ḳhayāl bhī

kitne buland-tar rahe vahm-o-gumāñ se ham

yuuñ intiḳhāb-e-zauq-e-mohabbat muhāl thā

ik gul bhī le sake na 'vafā' gulsitāñ se ham

bahlaenge firaq mein dil ko fughan se hum

taskin paenge to usi dastan se hum

hain wusat-e-KHayal teri ye inayaten

aazad ho gae hain jo qaid-e-makan se hum

phulon ke aas-pas the kanTe bhi sainkaDon

mayus-o-na-murad phire gulsitan se hum

majburi-e-firaq ne mazur kar diya

laen KHayal-e-zabt-e-mohabbat kahan se hum

phir wahshat-e-KHayal ne aaghosh mein liya

ai ghairat-e-shakeb chale ab yahan se hum

puchha jo us ne haal to KHamosh ho gae

tashrih-e-dard kar na sake kuchh zaban se hum

gir kar chaman ko barq ne taraj kar diya

nikle the kya samajh ke abhi aashiyan se hum

jo karwan tha wadi-e-ulfat mein rahnuma

aaKHir bichhaD ke rah gae us karwan se hum

uTThe jabin-e-shauq ye amr-e-muhaal hai

kuchh faiz pa rahe hain tere aastan se hum

jalwe ka eqtidar hai zauq-e-nigah par

dekhen kisi ke husn ko haT kar jahan se hum

barq-e-sharar-nawaz bhi sharma ke rah gai

is bebasi ke sath chale aashiyan se hum

pahuncha na koshishon pe kisi ka KHayal bhi

kitne buland-tar rahe wahm-o-guman se hum

yun intiKHab-e-zauq-e-mohabbat muhaal tha

ek gul bhi le sake na 'wafa' gulsitan se hum