bahr-e-gham mein ghota-zan hain kaisi kaisi hastiyan

bahr-e-ġham meñ ġhota-zan haiñ kaisī kaisī hastiyāñ

dard-e-sāhil pe hī kyoñ tum le rahe ho siskiyāñ

ret ke kachche gharauñde bah ga.e to fikr kyā

ek din sailāb le jā.egā saarī bastiyāñ

ek din phūloñ kī laalī tak churā le jā.eñgī

is chaman kī muḳhtalif rañgoñ kī uḌtī titliyāñ

ek jānib mai-kada hai ik taraf hai ḳhānqāh

dekhiye jaatī kidhar haiñ sūfiyoñ kī Toliyāñ

pahle mujh pe ek vahī uñglī uThātā thā 'sabā'

aur ab to be-shumār uThtī haiñ mujh pe uñgliyāñ

bahr-e-gham mein ghota-zan hain kaisi kaisi hastiyan

dard-e-sahil pe hi kyon tum le rahe ho siskiyan

ret ke kachche gharaunde bah gae to fikr kya

ek din sailab le jaega sari bastiyan

ek din phulon ki lali tak chura le jaengi

is chaman ki muKHtalif rangon ki uDti titliyan

ek jaanib mai-kada hai ek taraf hai KHanqah

dekhiye jati kidhar hain sufiyon ki Toliyan

pahle mujh pe ek wahi ungli uThata tha 'saba'

aur ab to be-shumar uThti hain mujh pe ungliyan