bahr-e-irfan se to KHush-fikr shanawar ubhre

bahr-e-irfāñ se to ḳhush-fikr shanāvar ubhre

ahl-e-zar Duub ga.e aur qalandar ubhre

lā.iq-e-dīd hai fankār ke chehre kā jamāl

shāḳh-e-afkār se jab koī gul-e-tar ubhre

manzileñ un ke qadam chūmne aa.eñ aksar

jin kī raftār se har-gām pe mahshar ubhre

dil-navāzī ne tirī aisā sahārā baḳhshā

sat.h-e-ehsās pe manzar pas-e-manzar ubhre

zindagī mauj-e-havādis se ulajhtī hī rahī

bahr-e-ālām meñ ham Duub ke aksar ubhre

rāh-e-masdūd pe ik na.ara-e-mastāna 'ziyā'

taaki is gumbad-e-be-dar se koī dar ubhre

bahr-e-irfan se to KHush-fikr shanawar ubhre

ahl-e-zar Dub gae aur qalandar ubhre

laiq-e-did hai fankar ke chehre ka jamal

shaKH-e-afkar se jab koi gul-e-tar ubhre

manzilen un ke qadam chumne aaen aksar

jin ki raftar se har-gam pe mahshar ubhre

dil-nawazi ne teri aisa sahaara baKHsha

sath-e-ehsas pe manzar pas-e-manzar ubhre

zindagi mauj-e-hawadis se ulajhti hi rahi

bahr-e-alam mein hum Dub ke aksar ubhre

rah-e-masdud pe ek nara-e-mastana 'ziya'

taki is gumbad-e-be-dar se koi dar ubhre