bahte dariya tham jaenge thoDa waqt guzarne do

bahte dariyā tham jā.eñge thoḌā vaqt guzarne do

vo bhī ab na yaad ā.eñge thoḌā vaqt guzarne do

na.e na.e un se bichhḌe haiñ taaza haiñ saare aañsū

ye mausam bhī murjhā.eñge thoḌā vaqt guzarne do

gard kī moTī tah jamne do kuchh to din kī āñkhoñ par

raushan manzar dhuñdlā.eñge thoḌā vaqt guzarne do

kab tak tanhā.ī ko apnā monis-o-hamdam jāneñge

is se bhī dil uktā.eñge thoḌā vaqt guzarne do

dhīre dhīre chup rahne kī aadat sī ho jā.egī

dīvār-o-dar katrā.eñge thoḌā vaqt guzarne do

āḳhir āḳhir sab kuchh khone kā andāza bhī hogā

vo bhī ik din pachhtā.eñge thoḌā vaqt guzarne do

aaj to apne saa.e se bhī bhāge bhāge phirte haiñ

kal ye ġham hī kaam ā.eñge thoḌā vaqt guzarne do

kaam na ā.eñgī jab āñkheñ thake thake jab hoñge paañv

bachche rasta dikhlā.eñge thoḌā vaqt guzarne do

yādoñ kā sailāb bhī jam jā.egā siine meñ 'parvāz'

aañsū patthar ho jā.eñge thoḌā vaqt guzarne do

bahte dariya tham jaenge thoDa waqt guzarne do

wo bhi ab na yaad aaenge thoDa waqt guzarne do

nae nae un se bichhDe hain taza hain sare aansu

ye mausam bhi murjhaenge thoDa waqt guzarne do

gard ki moTi tah jamne do kuchh to din ki aankhon par

raushan manzar dhundlaenge thoDa waqt guzarne do

kab tak tanhai ko apna monis-o-hamdam jaanenge

is se bhi dil uktaenge thoDa waqt guzarne do

dhire dhire chup rahne ki aadat si ho jaegi

diwar-o-dar katraenge thoDa waqt guzarne do

aaKHir aaKHir sab kuchh khone ka andaza bhi hoga

wo bhi ek din pachhtaenge thoDa waqt guzarne do

aaj to apne sae se bhi bhage bhage phirte hain

kal ye gham hi kaam aaenge thoDa waqt guzarne do

kaam na aaengi jab aankhen thake thake jab honge panw

bachche rasta dikhlaenge thoDa waqt guzarne do

yaadon ka sailab bhi jam jaega sine mein 'parwaz'

aansu patthar ho jaenge thoDa waqt guzarne do