bahut hain shahr mein shair fasana-go fankar

bahut haiñ shahr meñ shā'ir fasāna-go fankār

magar kahāñ hai koī ġham-nasīb kā ġham-ḳhvār

ye dasht-e-ġham kī tapish besh-az-azābannār

na koī chhāñv ghanī hai na sāya-e-dīvār

za-farq-tā-ba-qadam ek mauja-e-mai-e-nāb

takallumash ki baje jaise chāñdnī meñ sitār

baḌī ḳhamoshī se dil chūr-chūr hotā hai

shikast-e-shīsha-o-sāġhar nahīñ jo ho jhankār

tamām raat maiñ ḳhvāboñ meñ jāgtā hī rahā

chaḌhā huā hai in āñkhoñ meñ raat bhar kā ḳhumār

tamām dostoñ kā e'tibār chhīn liyā

us ajnabī ne nahīñ jis se koī qaul-o-qarār

azal kī tishnagī-e-dil ko kar ga.ī sairāb

ye terī narm-nigāhī kī narm narm phuvār

yahāñ to saaz kī maujoñ meñ bazm Duubī hai

sunegā kaun bhalā ik ġharīb dil kī pukār

bahut hain shahr mein sha'ir fasana-go fankar

magar kahan hai koi gham-nasib ka gham-KHwar

ye dasht-e-gham ki tapish besh-az-azabannar

na koi chhanw ghani hai na saya-e-diwar

za-farq-ta-ba-qadam ek mauja-e-mai-e-nab

takallumash ki baje jaise chandni mein sitar

baDi KHamoshi se dil chur-chur hota hai

shikast-e-shisha-o-saghar nahin jo ho jhankar

tamam raat main KHwabon mein jagta hi raha

chaDha hua hai in aankhon mein raat bhar ka KHumar

tamam doston ka e'tibar chhin liya

us ajnabi ne nahin jis se koi qaul-o-qarar

azal ki tishnagi-e-dil ko kar gai sairab

ye teri narm-nigahi ki narm narm phuwar

yahan to saz ki maujon mein bazm Dubi hai

sunega kaun bhala ek gharib dil ki pukar