bahut hasin the tum aur bahut jawan the hum

bahut hasīn the tum aur bahut javāñ the ham

ik iztirāb-e-musalsal kī dāstāñ the ham

ab is jagah pe haiñ kuchh aur chāhne vaale

vo ek baaġh kā gosha ki kal jahāñ the ham

hamārī āñkhoñ se zulmat kā dil laraztā thā

tulūa-e-mahr-e-munavvar ke rāz-dāñ the ham

hamāre hāthoñ se ab tak mahak sī aatī hai

ye kal kī baat hai phūloñ ke darmiyāñ the ham

machaltī rahtī thī dil meñ uḌaan kī ḳhvāhish

ḳhud apne sar pe ḳhayāloñ kā āsmāñ the ham

bikhar ga.e to bhaTakte hue musāfir haiñ

vo jin rutoñ meñ chale the to kārvāñ the ham

bahut hasin the tum aur bahut jawan the hum

ek iztirab-e-musalsal ki dastan the hum

ab is jagah pe hain kuchh aur chahne wale

wo ek bagh ka gosha ki kal jahan the hum

hamari aankhon se zulmat ka dil larazta tha

tulua-e-mahr-e-munawwar ke raaz-dan the hum

hamare hathon se ab tak mahak si aati hai

ye kal ki baat hai phulon ke darmiyan the hum

machalti rahti thi dil mein uDan ki KHwahish

KHud apne sar pe KHayalon ka aasman the hum

bikhar gae to bhaTakte hue musafir hain

wo jin ruton mein chale the to karwan the hum