bahut hasin thi kabhi ye duniya mere mutabiq

bahut hasīñ thī kabhī ye duniyā mire mutābiq

magar rahā ab na us kā chehra mire mutābiq

maiñ is liye ik daraḳht se baat kar rahī huuñ

rahegā chup yā javāb degā mire mutābiq

tire likhe ko ġhalat nahīñ kah rahī maiñ lekin

savāl ye hai ki kyoñ na likkhā mire mutābiq

yahāñ pe sab mere ḳhānvāde se āshnā haiñ

mirā ta.āruf na ho sakegā mire mutābiq

tire mutābiq maiñ terī rūdād sun chukī huuñ

nahīñ hai kirdār us meñ merā mire mutābiq

nikāl de tū hī merī āñkhoñ kī sūiyāñ ab

na aa.egā koī shāhzāda mire mutābiq

maiñ gungunātī faqat tirā naam us kī lai par

magar ye kam-baḳht dil na dhaḌkā mire mutābiq

bahut hasin thi kabhi ye duniya mere mutabiq

magar raha ab na us ka chehra mere mutabiq

main is liye ek daraKHt se baat kar rahi hun

rahega chup ya jawab dega mere mutabiq

tere likhe ko ghalat nahin kah rahi main lekin

sawal ye hai ki kyon na likkha mere mutabiq

yahan pe sab mere KHanwade se aashna hain

mera taaruf na ho sakega mere mutabiq

tere mutabiq main teri rudad sun chuki hun

nahin hai kirdar us mein mera mere mutabiq

nikal de tu hi meri aankhon ki suiyan ab

na aaega koi shahzada mere mutabiq

main gungunati faqat tera nam us ki lai par

magar ye kam-baKHt dil na dhaDka mere mutabiq