bahut hasin yahan ki faza lage hai mujhe

bahut hasīn yahāñ kī fazā lage hai mujhe

dayār-e-yār to jannat-numā lage hai mujhe

har ek rang meñ jalva-numā lage hai mujhe

jamāl-e-dost jamāl-e-ḳhudā lage hai mujhe

kisī kī zulf kā jis din se paḌ gayā saaya

tamām jism mahaktā huā lage hai mujhe

maiñ jab bhī tere tasavvur meñ Duub jaatā huuñ

mirā vajūd tirā aa.ina lage hai mujhe

sar-e-niyāz jhukā.ūñ kahāñ kahāñ āḳhir

har ek naqsh tirā naqsh-e-pā lage hai mujhe

tire ḳhayāl ke dāman ko thaam letā huuñ

mirā safīna jahāñ Dūbtā lage hai mujhe

mire habīb ke kūche kī ḳhaak kā 'nayyar'

har ek zarra dur-e-be-bahā lage hai mujhe

bahut hasin yahan ki faza lage hai mujhe

dayar-e-yar to jannat-numa lage hai mujhe

har ek rang mein jalwa-numa lage hai mujhe

jamal-e-dost jamal-e-KHuda lage hai mujhe

kisi ki zulf ka jis din se paD gaya saya

tamam jism mahakta hua lage hai mujhe

main jab bhi tere tasawwur mein Dub jata hun

mera wajud tera aaina lage hai mujhe

sar-e-niyaz jhukaun kahan kahan aaKHir

har ek naqsh tera naqsh-e-pa lage hai mujhe

tere KHayal ke daman ko tham leta hun

mera safina jahan Dubta lage hai mujhe

mere habib ke kuche ki KHak ka 'nayyar'

har ek zarra dur-e-be-baha lage hai mujhe