bahut KHajil hain ki hum raegan bhi zinda rahe

bahut ḳhajil haiñ ki ham rā.egāñ bhī zinda rahe

jahāñ pe tū bhī nahīñ thā vahāñ bhī zinda rahe

ajiib shart hai is be-yaqīñ mizāj kī bhī

ki tū bhī paas ho terā gumāñ bhī zinda rahe

tujhe pe zid hai magar is tarah nahīñ hotā

ki tū bhī zinda rahe dāstāñ bhī zinda rahe

vo kaun log the jin kā vajūd jism se thā

ye kaun haiñ jo pas-e-jism-o-jāñ bhī zinda rahe

jo ye na ho to suḳhan kā koī javāz nahīñ

zamīr zinda rahe to zabāñ bhī zinda rahe

ye kā.enāt faqat manfa.at kā naam nahīñ

koī yahāñ pe barā.e ziyāñ bhī zinda rahe

adam meñ jo bhī nahīñ thā vo sab vajūd meñ thā

ye ham hī the jo kahīñ darmiyāñ bhī zinda rahe

bahut KHajil hain ki hum raegan bhi zinda rahe

jahan pe tu bhi nahin tha wahan bhi zinda rahe

ajib shart hai is be-yaqin mizaj ki bhi

ki tu bhi pas ho tera guman bhi zinda rahe

tujhe pe zid hai magar is tarah nahin hota

ki tu bhi zinda rahe dastan bhi zinda rahe

wo kaun log the jin ka wajud jism se tha

ye kaun hain jo pas-e-jism-o-jaan bhi zinda rahe

jo ye na ho to suKHan ka koi jawaz nahin

zamir zinda rahe to zaban bhi zinda rahe

ye kaenat faqat manfat ka nam nahin

koi yahan pe barae ziyan bhi zinda rahe

adam mein jo bhi nahin tha wo sab wajud mein tha

ye hum hi the jo kahin darmiyan bhi zinda rahe