bahut mushkil hai tark-e-arzu rabt-ashna ho kar

bahut mushkil hai tark-e-ārzū rabt-āshnā ho kar

guzar jā vādī-e-pur-ḳhār se bād-e-sabā ho kar

lagā doge tamannā ke safīne ko kināre se

ma.āz-allāh dāva-e-ḳhudā.ī nā-ḳhudā ho kar

har ik ho silsila rañgīñ gunāhoñ ke salāsil kā

nahīñ āsān duniyā se guzarnā pārsā ho kar

mirī pinhā.ī-e-ilm-o-ḳhabar kī intihā ye hai

ki ik qatre se nā-vāqif huuñ dariyā-āshnā ho kar

kahāñ tāb-e-judā.ī ab to ye mahsūs hotā hai

ki maiñ ḳhud se judā ho jā.ūñgā tum se judā ho kar

tirā dar chhoḌ duuñ lekin tire dar ke sivā saaqī

kahāñ jā.ūñ kidhar jā.ūñ zamāne se ḳhafā ho kar

jo shikva un se karnā thā vo un ke rū-ba-rū 'darshan'

zabāñ tak aate aate rah gayā harf-e-duā ho kar

bahut mushkil hai tark-e-arzu rabt-ashna ho kar

guzar ja wadi-e-pur-KHar se baad-e-saba ho kar

laga doge tamanna ke safine ko kinare se

maaz-allah dawa-e-KHudai na-KHuda ho kar

har ek ho silsila rangin gunahon ke salasil ka

nahin aasan duniya se guzarna parsa ho kar

meri pinhai-e-ilm-o-KHabar ki intiha ye hai

ki ek qatre se na-waqif hun dariya-ashna ho kar

kahan tab-e-judai ab to ye mahsus hota hai

ki main KHud se juda ho jaunga tum se juda ho kar

tera dar chhoD dun lekin tere dar ke siwa saqi

kahan jaun kidhar jaun zamane se KHafa ho kar

jo shikwa un se karna tha wo un ke ru-ba-ru 'darshan'

zaban tak aate aate rah gaya harf-e-dua ho kar