bahut rangin dilkash hai majazi pyar ki duniya

bahut rañgīn dilkash hai majāzī pyaar kī duniyā

ubharne hī nahīñ detī lab-o-ruḳhsār kī duniyā

zamāna se judā kar de haqīqat ko fanā kar de

faqat ḳhvāboñ meñ le jaa.e hasīñ dildār kī duniyā

yahāñ jhūToñ kā mela hai jo bole sach akelā hai

yaqīñ gar hai nahīñ dekho zarā aḳhbār kī duniyā

ġharīboñ ko satātī hai amīroñ ko banātī hai

laḌā kar sirf insāñ ko chale sarkār kī duniyā

talab sūraj kī mat karnā na dāman aag se bharnā

charāġhoñ se munavvar tum karo ghar-bār kī duniyā

zarūrat DhūñDh letī hai ki rasta mil hī jaatā hai

kare aadam agar koshish khule asrār kī duniyā

bahut rangin dilkash hai majazi pyar ki duniya

ubharne hi nahin deti lab-o-ruKHsar ki duniya

zamana se juda kar de haqiqat ko fana kar de

faqat KHwabon mein le jae hasin dildar ki duniya

yahan jhuTon ka mela hai jo bole sach akela hai

yaqin gar hai nahin dekho zara aKHbar ki duniya

gharibon ko satati hai amiron ko banati hai

laDa kar sirf insan ko chale sarkar ki duniya

talab suraj ki mat karna na daman aag se bharna

charaghon se munawwar tum karo ghar-bar ki duniya

zarurat DhunDh leti hai ki rasta mil hi jata hai

kare aadam agar koshish khule asrar ki duniya