bahut sahi gham-e-giti sharab kam kya hai

bahut sahī ġham-e-gītī sharāb kam kyā hai

ġhulām-e-sāqī-e-kausar huuñ mujh ko ġham kyā hai

tumhārī tarz-o-ravish jānte haiñ ham kyā hai

raqīb par hai agar lutf to sitam kyā hai

suḳhan meñ ḳhāma-e-ġhālib kī ātish-afshānī

yaqīñ hai ham ko bhī lekin ab us meñ dam kyā hai

kaTe to shab kaheñ kaaTe to saañp kahlāve

koī batāo ki vo zulf-e-ḳham-ba-ḳham kyā hai

likhā kare koī ahkām-e-tāla-e-maulūd

kise ḳhabar hai ki vaañ jumbish-e-qalam kyā hai

na hashr-o-nashr kā qaa.il na kesh o millat kā

ḳhudā ke vāste aise kī phir qasam kyā hai

vo dād-o-dīd garāñ-māya shart hai hamdam

vagarna mehr-e-sulaimān-o-jām-e-jam kyā hai

bahut sahi gham-e-giti sharab kam kya hai

ghulam-e-saqi-e-kausar hun mujh ko gham kya hai

tumhaari tarz-o-rawish jaante hain hum kya hai

raqib par hai agar lutf to sitam kya hai

suKHan mein KHama-e-ghaalib ki aatish-afshani

yaqin hai hum ko bhi lekin ab us mein dam kya hai

kaTe to shab kahen kaTe to sanp kahlawe

koi batao ki wo zulf-e-KHam-ba-KHam kya hai

likha kare koi ahkaam-e-tala-e-maulud

kise KHabar hai ki wan jumbish-e-qalam kya hai

na hashr-o-nashr ka qail na kesh o millat ka

KHuda ke waste aise ki phir qasam kya hai

wo dad-o-did garan-maya shart hai hamdam

wagarna mehr-e-sulaiman-o-jam-e-jam kya hai