bahut sarshaar tha apne sarasar josh mein dariya

bahut sarshār thā apne sarāsar josh meñ dariyā

tamāñche mauj ke khaa.e to aaya hosh meñ dariyā

Duboyā josh-e-vahshat meñ hameñ sahrā-navardī ne

bahāyā ābloñ ne paañv ke pā-posh meñ dariyā

na chheḌ ai sozan-e-mizhgāñ mire dil ke phaphole ko

ki hikmat se kiyā hai band is sar-posh meñ dariyā

jahāz-e-ulfat-e-dil kā nigahbāñ hai ḳhudā hī ab

samundar kī tarah aaya hai ġham kā josh meñ dariyā

galā kaaTā chhure se apnā mizhgāñ ke tasavvur meñ

bahāyā shab lahū kā ham ne bālā-posh meñ dariyā

bharosā kuchh nahīñ sail-e-fanā kī āshnā.ī kā

kahe hai ye habāboñ ke hamesha gosh meñ dariyā

jo chhoḌīñ machhliyāñ mehñdī lagā kar us ne paañv meñ

kaf-e-pā kā pasīna ban gayā pā-posh meñ dariyā

mirī ashkoñ kī tuġhyānī 'hayā' kyā sar uThā.eñgī

samundar sā nihāñ hai charḳh ke sar-posh meñ dariyā

bahut sarshaar tha apne sarasar josh mein dariya

tamanche mauj ke khae to aaya hosh mein dariya

Duboya josh-e-wahshat mein hamein sahra-nawardi ne

bahaya aablon ne panw ke pa-posh mein dariya

na chheD ai sozan-e-mizhgan mere dil ke phaphole ko

ki hikmat se kiya hai band is sar-posh mein dariya

jahaz-e-ulfat-e-dil ka nigahban hai KHuda hi ab

samundar ki tarah aaya hai gham ka josh mein dariya

gala kaTa chhure se apna mizhgan ke tasawwur mein

bahaya shab lahu ka hum ne baala-posh mein dariya

bharosa kuchh nahin sail-e-fana ki aashnai ka

kahe hai ye hababon ke hamesha gosh mein dariya

jo chhoDin machhliyan mehndi laga kar us ne panw mein

kaf-e-pa ka pasina ban gaya pa-posh mein dariya

meri ashkon ki tughyani 'haya' kya sar uThaengi

samundar sa nihan hai charKH ke sar-posh mein dariya