bahut shadab ho lekin bayabani nahin jati

bahut shādāb ho lekin bayābānī nahīñ jaatī

ki bām-e-auj chhūne se bhī arzānī nahīñ jaatī

ka.ī chehroñ ne āvāzoñ ne dil ābād rakkhā hai

magar āñkhoñ meñ raqsāñ hai jo vīrānī nahīñ jaatī

mujhe apnī numū ke vāste tum se bichhaḌnā hai

tumhāre saath rahne se tan-āsānī nahīñ jaatī

maiñ is dil kī sabhī sachchā.iyāñ taslīm kartā huuñ

magar ik baat aisī bhī hai jo maanī nahīñ jaatī

hujūm-e-shor-o-ġhul meñ kaun thā kis ne pukārā thā

yahāñ to apnī bhī āvāz pahchānī nahīñ jaatī

'samīr' is ishq meñ insān kyā itnā badaltā hai

maiñ ḳhud par ġhaur kartā huuñ to hairānī nahīñ jaatī

bahut shadab ho lekin bayabani nahin jati

ki baam-e-auj chhune se bhi arzani nahin jati

kai chehron ne aawazon ne dil aabaad rakkha hai

magar aankhon mein raqsan hai jo virani nahin jati

mujhe apni numu ke waste tum se bichhaDna hai

tumhaare sath rahne se tan-asani nahin jati

main is dil ki sabhi sachchaiyan taslim karta hun

magar ek baat aisi bhi hai jo mani nahin jati

hujum-e-shor-o-ghul mein kaun tha kis ne pukara tha

yahan to apni bhi aawaz pahchani nahin jati

'samir' is ishq mein insan kya itna badalta hai

main KHud par ghaur karta hun to hairani nahin jati