bahut thakan badan mein mere safar ki rahi

bahut thakān badan meñ mire safar kī rahī

magar vo shauq kī manzil ki har nagar kī rahī

vo jis pe chal ke sadā paañv zaḳhm zaḳhm hue

na jaane khoj hameñ kyoñ usī Dagar kī rahī

jo merī zaat kī pinhā.iyāñ samajh letī

tamām umr zarūrat usī nazar kī rahī

jab apne aap meñ Duube falak ko chhū aa.e

ki ehtiyāj hameñ ab na bāl-o-par kī rahī

hamīñ se sunnat-e-mansūr ab bhī zinda hai

ki har zamāne ko hājat hamāre sar kī rahī

bilā-sabab to 'karāmat' pe apnī naaz nahīñ

ki chār-dāñg meñ shohrat mire asar kī rahī

bahut thakan badan mein mere safar ki rahi

magar wo shauq ki manzil ki har nagar ki rahi

wo jis pe chal ke sada panw zaKHm zaKHm hue

na jaane khoj hamein kyon usi Dagar ki rahi

jo meri zat ki pinhaiyan samajh leti

tamam umr zarurat usi nazar ki rahi

jab apne aap mein Dube falak ko chhu aae

ki ehtiyaj hamein ab na baal-o-par ki rahi

hamin se sunnat-e-mansur ab bhi zinda hai

ki har zamane ko hajat hamare sar ki rahi

bila-sabab to 'karamat' pe apni naz nahin

ki chaar-dang mein shohrat mere asar ki rahi