baiTha hai sogwar sitamgar ke shahr mein

baiThā hai sogvār sitamgar ke shahr meñ

kis ko pukāre ā.īna patthar ke shahr meñ

bejā nahīñ fazāoñ kā hairat meñ Dūbnā

itnā sukūt aur suḳhan-var ke shahr meñ

is daur meñ usī ko hunar-mand māniye

jiinā nahīñ paḌā jise mar mar ke shahr meñ

manzil qarīb aa.ī to rasta bhulā gayā

phirte haiñ ḳhaak chhānte rahbar ke shahr meñ

sūraj nazar bachā ke to guzrā na thā magar

utrīñ nahīñ shuā.eñ muqaddar ke shahr meñ

insāñ kahūñ unheñ ki farishtoñ kā naam duuñ

jo log dard-mand haiñ be-ghar ke shahr meñ

shāyad nikal hī aa.e koī chāragar 'figār'

ik baar aur dekh sadā kar ke shahr meñ

baiTha hai sogwar sitamgar ke shahr mein

kis ko pukare aaina patthar ke shahr mein

beja nahin fazaon ka hairat mein Dubna

itna sukut aur suKHan-war ke shahr mein

is daur mein usi ko hunar-mand maniye

jina nahin paDa jise mar mar ke shahr mein

manzil qarib aai to rasta bhula gaya

phirte hain KHak chhante rahbar ke shahr mein

suraj nazar bacha ke to guzra na tha magar

utrin nahin shuaen muqaddar ke shahr mein

insan kahun unhen ki farishton ka nam dun

jo log dard-mand hain be-ghar ke shahr mein

shayad nikal hi aae koi chaaragar 'figar'

ek bar aur dekh sada kar ke shahr mein