baiTha nahin hun saya-e-diwar dekh kar

baiThā nahīñ huuñ sāya-e-dīvār dekh kar

Thahrā huā huuñ vaqt kī raftār dekh kar

ham-mashrabī kī sharm gavārā na ho sakī

ḳhud chhoḌ dī hai shaiḳh ko mai-ḳhvār dekh kar

kyā dekhtā hai ai dil-e-mushtāq-e-dīd ab

ham ne to kah diyā thā ḳhabar-dār dekh kar

aane lagī hai ishq ko ġhairat par apnī sharm

shāyad tirī nigāh ko bezār dekh kar

kyā kyā fareb-e-aql diye un kī bazm ne

mere junūñ ko mahram-e-asrār dekh kar

kyā jaane bahr-e-ishq meñ kitne hue haiñ ġharq

sāhil se sat.h aab ko hamvār dekh kar

duniyā kī zindagī kā tasavvur hai sub.h-e-hashr

jaagā huuñ ḳhud ko ḳhvāb meñ bedār dekh kar

haiñ aaj tak nigāh meñ hālāñki aaj tak

dekhā na phir kabhī unheñ ik baar dekh kar

dast-e-vafā se dāman-e-dil ko chhuḌā liyā

ahl-e-havas ne ishq ko dushvār dekh kar

'bismil' tum aaj rote ho anjām-e-ishq ko

ham kal samajh ga.e the kuchh āsār dekh kar

baiTha nahin hun saya-e-diwar dekh kar

Thahra hua hun waqt ki raftar dekh kar

ham-mashrabi ki sharm gawara na ho saki

KHud chhoD di hai shaiKH ko mai-KHwar dekh kar

kya dekhta hai ai dil-e-mushtaq-e-did ab

hum ne to kah diya tha KHabar-dar dekh kar

aane lagi hai ishq ko ghairat par apni sharm

shayad teri nigah ko bezar dekh kar

kya kya fareb-e-aql diye un ki bazm ne

mere junun ko mahram-e-asrar dekh kar

kya jaane bahr-e-ishq mein kitne hue hain gharq

sahil se sath aab ko hamwar dekh kar

duniya ki zindagi ka tasawwur hai subh-e-hashr

jaga hun KHud ko KHwab mein bedar dekh kar

hain aaj tak nigah mein haalanki aaj tak

dekha na phir kabhi unhen ek bar dekh kar

dast-e-wafa se daman-e-dil ko chhuDa liya

ahl-e-hawas ne ishq ko dushwar dekh kar

'bismil' tum aaj rote ho anjam-e-ishq ko

hum kal samajh gae the kuchh aasar dekh kar