baiThe baiThe main gulistan bhi ho jata hun

baiThe baiThe maiñ gulistān bhī ho jaatā huuñ

chand mintoñ meñ bayābān bhī ho jaatā huuñ

apnī āñkhoñ pe yaqīn aatā nahīñ hai mujh ko

aa.ina dekh ke hairān bhī ho jaatā huuñ

ai charāġho mujhe tum añkh dikhānā chhoḌo

kabhī āñdhī kabhī tūfān bhī ho jaatā huuñ

maiñ riyāzī kī tarah lagtā huuñ mushkil lekin

thoḌī koshish se maiñ āsān bhī ho jaatā huuñ

maiñ kisī baat pe hairān nahīñ hotā kyoñ

maiñ isī baat pe hairān bhī ho jaatā huuñ

bhuul jaatā huuñ kahīñ rakh ke maiñ aksar ḳhud ko

DhūñDte DhūñDte halkān bhī ho jaatā huuñ

mere andar bhī kabhī chaltī hai zahrīlī havā

shahr huuñ par kabhī vīrān bhī ho jaatā huuñ

apne hoñToñ pe lagā letā huuñ maiñ qufl 'kamāl'

maiñ kabhī aañkh kabhī kaan bhī ho jaatā huuñ

baiThe baiThe main gulistan bhi ho jata hun

chand minton mein bayaban bhi ho jata hun

apni aankhon pe yaqin aata nahin hai mujh ko

aaina dekh ke hairan bhi ho jata hun

ai charagho mujhe tum ankh dikhana chhoDo

kabhi aandhi kabhi tufan bhi ho jata hun

main riyazi ki tarah lagta hun mushkil lekin

thoDi koshish se main aasan bhi ho jata hun

main kisi baat pe hairan nahin hota kyon

main isi baat pe hairan bhi ho jata hun

bhul jata hun kahin rakh ke main aksar KHud ko

DhunDte DhunDte halkan bhi ho jata hun

mere andar bhi kabhi chalti hai zahrili hawa

shahr hun par kabhi viran bhi ho jata hun

apne honTon pe laga leta hun main qufl 'kamal'

main kabhi aankh kabhi kan bhi ho jata hun