baiThe hain gesuon ko pareshan kiye hue

baiThe haiñ gesuoñ ko pareshāñ kiye hue

mere junūñ ko husn kā unvāñ kiye hue

jī chāhtā hai kījiye barham mizāj-e-husn

muddat huī hai un ko numāyāñ kiye hue

jur.at to merī dekh ki huuñ tere sāmne

hastī se apnī tujh ko numāyāñ kiye hue

rakhtā huuñ sau muāmle tujh se ba-faiz-e-dil

apnī nazar se bhī tujhe pinhāñ kiye hue

hai vo nazar tavāzo-e-ulfat se mutma.in

mehmāñ ko nazr-e-shoḳhī-e-mizhgāñ kiye hue

yā-rab phir ek baar faqīroñ pe marhamat

muddat huī ziyārat-e-insāñ kiye hue

goyā unhīñ kī yaad meñ hai 'maikash'-e-ḳharāb

ḳhud apne kufr-e-ishq ko īmāñ kiye hue

baiThe hain gesuon ko pareshan kiye hue

mere junun ko husn ka unwan kiye hue

ji chahta hai kijiye barham mizaj-e-husn

muddat hui hai un ko numayan kiye hue

jurat to meri dekh ki hun tere samne

hasti se apni tujh ko numayan kiye hue

rakhta hun sau muamle tujh se ba-faiz-e-dil

apni nazar se bhi tujhe pinhan kiye hue

hai wo nazar tawazo-e-ulfat se mutmain

mehman ko nazr-e-shoKHi-e-mizhgan kiye hue

ya-rab phir ek bar faqiron pe marhamat

muddat hui ziyarat-e-insan kiye hue

goya unhin ki yaad mein hai 'maikash'-e-KHarab

KHud apne kufr-e-ishq ko iman kiye hue