baiThe hain kyon andhera kiye waqt-e-sham log

baiThe haiñ kyoñ añdherā kiye vaqt-e-shām log

kyoñ raushnī kā karte nahīñ intizām log

is vaqt ḳhaas logoñ ke munsif asar meñ hai

rūdād-e-ġham sunā.eñ kise apnī 'aam log

jo rāsta hai amn-o-mohabbat kā rāsta

us rāste pe chalte nahīñ tez-gām log

dil meñ ġhubār un ke hai lekin bharā huā

aate nazar haiñ yuuñ to bahut ḳhush-kalām log

daulat ko hai kamāne kī kuchh aisī dhun savār

pahchānte nahīñ haiñ halāl-o-harām log

tum to zabāñ se apnī na mujh ko burā kaho

tanqīd mujh pe karte haiñ yuuñ to tamām log

mazlūmoñ ke lahū se rañge un ke haath haiñ

jo amn kā haiñ dete jahāñ ko payām log

āñkheñ dikhā rahe haiñ hameñ aaj vo 'qamar'

kal tak jo ham ko karte the jhuk kar salām log

baiThe hain kyon andhera kiye waqt-e-sham log

kyon raushni ka karte nahin intizam log

is waqt KHas logon ke munsif asar mein hai

rudad-e-gham sunaen kise apni 'am log

jo rasta hai amn-o-mohabbat ka rasta

us raste pe chalte nahin tez-gam log

dil mein ghubar un ke hai lekin bhara hua

aate nazar hain yun to bahut KHush-kalam log

daulat ko hai kamane ki kuchh aisi dhun sawar

pahchante nahin hain halal-o-haram log

tum to zaban se apni na mujh ko bura kaho

tanqid mujh pe karte hain yun to tamam log

mazlumon ke lahu se range un ke hath hain

jo amn ka hain dete jahan ko payam log

aankhen dikha rahe hain hamein aaj wo 'qamar'

kal tak jo hum ko karte the jhuk kar salam log