bajte hain sar jo dil mein bata majra hai kya

bajte haiñ sar jo dil meñ batā mājrā hai kyā

tujh se kisī ne kaan meñ kuchh kah diyā hai kyā

hamdam bhī ham-ḳhayāl bhī tū ham-safar bhī hai

ab mujh meñ tujh meñ farq koī rah gayā hai kyā

jiite haiñ zindagī ko magar jānte nahīñ

rāz-e-hayāt kyā hai baqā kyā fanā hai kyā

har zarra kā.enāt kā tā'līm-gāh hai

kirdār kah rahe haiñ ki kis ne paḌhā hai kyā

jhuk jā.egī har ek jabīñ is zamīn par

mā'lūm ho jo in ko ki āḳhir ḳhudā hai kyā

pāband-e-haq the ‘ālam-e-arvāh meñ sabhī

ab yaad bhī nahīñ hai ki 'ahd-e-vafā hai kyā

bajte hain sar jo dil mein bata majra hai kya

tujh se kisi ne kan mein kuchh kah diya hai kya

hamdam bhi ham-KHayal bhi tu ham-safar bhi hai

ab mujh mein tujh mein farq koi rah gaya hai kya

jite hain zindagi ko magar jaante nahin

raaz-e-hayat kya hai baqa kya fana hai kya

har zarra kaenat ka ta'lim-gah hai

kirdar kah rahe hain ki kis ne paDha hai kya

jhuk jaegi har ek jabin is zamin par

ma'lum ho jo in ko ki aaKHir KHuda hai kya

paband-e-haq the ‘alam-e-arwah mein sabhi

ab yaad bhi nahin hai ki 'ahd-e-wafa hai kya