baKHshe na gae ek ko baKHsha na kabhi

baḳhshe na ga.e ek ko baḳhshā na kabhī

raste pe magar aa.ī ye duniyā na kabhī

lāchār ḳhud apnā hī qasīda likkhā

qābil koī mīzān pe utrā na kabhī

gardan bhī re.āyā kī jhukā.e rakkhī

uThne diyā ehsān kā palḌā na kabhī

bharte hī rahe suud meñ ik ik dhaḌkan

mansūḳh kiyā dard kā saudā na kabhī

ab kis ko pata baam pe chehra thā ki chāñd

koī sar uThā.e hue guzrā na kabhī

bānū-e-sabā ḳhāk-nashīñ par bhī nigāh

nāchīz pe karnā paḌe takiya na kabhī

parchhā.iyoñ kī jañg thī ḳhuuñ kā dariyā

ham-zād rajaz-ḳhvāñ huā aisā na kabhī

pheñk aao ḳhalāoñ meñ shikasta kashkol

is burj meñ Thahregā sitāra na kabhī

jab saaya bhī shīshe kī tarah TuuT gayā

dīvār ne dekhā ye tamāsha na kabhī

baKHshe na gae ek ko baKHsha na kabhi

raste pe magar aai ye duniya na kabhi

lachaar KHud apna hi qasida likkha

qabil koi mizan pe utra na kabhi

gardan bhi reaya ki jhukae rakkhi

uThne diya ehsan ka palDa na kabhi

bharte hi rahe sud mein ek ek dhaDkan

mansuKH kiya dard ka sauda na kabhi

ab kis ko pata baam pe chehra tha ki chand

koi sar uThae hue guzra na kabhi

banu-e-saba KHak-nashin par bhi nigah

nachiz pe karna paDe takiya na kabhi

parchhaiyon ki jang thi KHun ka dariya

ham-zad rajaz-KHwan hua aisa na kabhi

phenk aao KHalaon mein shikasta kashkol

is burj mein Thahrega sitara na kabhi

jab saya bhi shishe ki tarah TuT gaya

diwar ne dekha ye tamasha na kabhi