bal paDne laga abru-e-KHamdar ke upar

bal paḌne lagā abrū-e-ḳhamdār ke uupar

aa jaa.e na aafat kahīñ do-chār ke uupar

qatrāt-e-araq haiñ nahīñ ye silk-e-guhar haiñ

kyā aks-fagan us ruḳh-e-gulnār ke uupar

ḳhūñ-rezī pe bāñdhegā kamar jab ki vo saffāk

gulzār banā degā tan-e-zār ke uupar

bosa jo talab maiñ ne kiyā bole ye aġhyār

talvār chalegī isī takrār ke uupar

va.ada kiyā aane kā par aa.e nahīñ hargiz

kyā ho.e yaqīn aap ke iqrār ke uupar

ḳhūboñ ko mohabbat hai buroñ se bhī ki juuñ gul

rahtā hai sadā sāya-fagan ḳhaar ke uupar

tāsīr hai taqrīr meñ us shoḳh kī itnī

ḳhāmosh huiiñ bulbuleñ guftār ke uupar

bal paDne laga abru-e-KHamdar ke upar

aa jae na aafat kahin do-chaar ke upar

qatraat-e-araq hain nahin ye silk-e-guhar hain

kya aks-fagan us ruKH-e-gulnar ke upar

KHun-rezi pe bandhega kamar jab ki wo saffak

gulzar bana dega tan-e-zar ke upar

bosa jo talab main ne kiya bole ye aghyar

talwar chalegi isi takrar ke upar

wada kiya aane ka par aae nahin hargiz

kya hoe yaqin aap ke iqrar ke upar

KHubon ko mohabbat hai buron se bhi ki jun gul

rahta hai sada saya-fagan KHar ke upar

tasir hai taqrir mein us shoKH ki itni

KHamosh huin bulbulen guftar ke upar