bala-e-tira-shabi ka jawab le aae

balā-e-tīra-shabī kā javāb le aa.e

bujhe charāġh to ham āftāb le aa.e

bikhar ga.e jo kabhī chashm-e-intizār ke rañg

is anjuman se ham ik aur ḳhvāb le aa.e

ham is zamīn pe mīzān-e-adl rakhte haiñ

kaho zamāne se fard-e-hisāb le aa.e

har ek ġham se salāmat guzar gayā hai dil

ḳhudā kare ki mohabbat kī taab le aa.e

ga.e the ham bhī in āñkhoñ se māñgne kyā kyā

vahī huā ki bas ik iztirāb le aa.e

hamārī laġhzish-e-paiham ko rā.egāñ na samajh

ajab nahīñ ki yahī inqalāb le aa.e

na laa.e kuchh bhī ham āshob-e-dahr meñ 'aḳhtar'

bas ek hausla-e-iztirāb le aa.e

bala-e-tira-shabi ka jawab le aae

bujhe charagh to hum aaftab le aae

bikhar gae jo kabhi chashm-e-intizar ke rang

is anjuman se hum ek aur KHwab le aae

hum is zamin pe mizan-e-adl rakhte hain

kaho zamane se fard-e-hisab le aae

har ek gham se salamat guzar gaya hai dil

KHuda kare ki mohabbat ki tab le aae

gae the hum bhi in aankhon se mangne kya kya

wahi hua ki bas ek iztirab le aae

hamari laghzish-e-paiham ko raegan na samajh

ajab nahin ki yahi inqalab le aae

na lae kuchh bhi hum aashob-e-dahr mein 'aKHtar'

bas ek hausla-e-iztirab le aae