bala-kash-e-gham-e-geti hai jaan-e-zar abhi

balā-kash-e-ġham-e-getī hai jān-e-zār abhī

hayāt sar pe uThā.e hue baar abhī

milī kahāñ hai tujhe terī rahguzār abhī

hai yaañ se duur bahut duur kū-e-yār abhī

mah-o-nujūm fasurda gul-o-saman giryāñ

hai kā.enāt mire ġham meñ sogvār abhī

kahūñ to kaise kahūñ us ko daur-e-adl-o-atā

hai dār-o-gīr abhī jabr-o-iḳhtiyār abhī

balā.eñ aa.iiñ sitam par sitam hue lekin

badal sakā na zamāna mirā shi.ār abhī

sitāre Duub ga.e sham.eñ bujh ga.iiñ jal kar

khulī huī hai magar chashm-e-intizār abhī

dayār-e-dil meñ na jaane hai kab se vīrānī

va-lek shahr-e-nigārāñ meñ hai bahār abhī

uTho sañvāro nikhāro hayāt-e-nau baḳhsho

urūs-e-dahr kī āñkhoñ meñ hai ḳhumār abhī

na naam loge jafāoñ kā bhuul kar bhī 'jalīl'

nahīñ hue ho jafāoñ se ham-kanār abhī

bala-kash-e-gham-e-geti hai jaan-e-zar abhi

hayat sar pe uThae hue bar abhi

mili kahan hai tujhe teri rahguzar abhi

hai yan se dur bahut dur ku-e-yar abhi

mah-o-nujum fasurda gul-o-saman giryan

hai kaenat mere gham mein sogwar abhi

kahun to kaise kahun us ko daur-e-adl-o-ata

hai dar-o-gir abhi jabr-o-iKHtiyar abhi

balaen aain sitam par sitam hue lekin

badal saka na zamana mera shiar abhi

sitare Dub gae shamen bujh gain jal kar

khuli hui hai magar chashm-e-intizar abhi

dayar-e-dil mein na jaane hai kab se virani

wa-lek shahr-e-nigaran mein hai bahaar abhi

uTho sanwaro nikhaaro hayat-e-nau baKHsho

urus-e-dahr ki aankhon mein hai KHumar abhi

na nam loge jafaon ka bhul kar bhi 'jalil'

nahin hue ho jafaon se ham-kanar abhi