ban ke sahil ki nigahon mein tamasha hum log

ban ke sāhil kī nigāhoñ meñ tamāshā ham log

naqsh-e-pā DhūñD rahe haiñ sar-e-dariyā ham log

saa.e chhūTe to pighalne lage phir dhuup meñ jism

kaash hote na kabhī ḳhud se shanāsā ham log

ham ko nafrat hai añdheroñ se magar kyā kiije

ki ujāloñ se bhī rakhte nahīñ rishta ham log

kuchh nazar aatā nahīñ jin meñ dhuñdlakoñ ke sivā

karte rahte haiñ unhīñ ḳhvāboñ ke dar vā ham log

zehn par baar hai āñkhoñ kā muqaddar hai thakan

ḳhvāb agar dekhte bhī haiñ to adhūrā ham log

apnī hī āñkhoñ se girte hue dekhā jis ko

DhūñDhte kyuuñ usī dīvār kā saayā ham log

ban ke sahil ki nigahon mein tamasha hum log

naqsh-e-pa DhunD rahe hain sar-e-dariya hum log

sae chhuTe to pighalne lage phir dhup mein jism

kash hote na kabhi KHud se shanasa hum log

hum ko nafrat hai andheron se magar kya kije

ki ujalon se bhi rakhte nahin rishta hum log

kuchh nazar aata nahin jin mein dhundlakon ke siwa

karte rahte hain unhin KHwabon ke dar wa hum log

zehn par bar hai aankhon ka muqaddar hai thakan

KHwab agar dekhte bhi hain to adhura hum log

apni hi aankhon se girte hue dekha jis ko

DhunDhte kyun usi diwar ka saya hum log