bana hai shahr mein jis ka makan shishe ka

banā hai shahr meñ jis kā makān shīshe kā

vo chāhtā hai bane āsmān shīshe kā

ye chand haath ye patthar miTā na pā.eñge

bahut baḌā hai yahāñ ḳhāndān shīshe kā

maiñ tez dhuup se ḳhud ko bachāne pahuñchā thā

nasīb dekho milā sā.ebān shīshe kā

hasīn chāñd se chehre ko rū-ba-rū rakh kar

vo aaj toḌ gayā hai gumān shīshe kā

mire qabīle kā sardār jab huā andhā

miTā qabīle se har ik nishān shīshe kā

karoḌoñ logoñ ke sar par nahīñ hai chhat lekin

banā rahā hai vo hindostān shīshe kā

huzūr aap ne kāġhaz ke phuul rakkhe haiñ

kahāñ se laa.e mahak phūl-dān shīshe kā

sadāqatoñ kī shahādat ke naam par 'aḳhlāq'

qadam-qadam pe huā imtihān shīshe kā

bana hai shahr mein jis ka makan shishe ka

wo chahta hai bane aasman shishe ka

ye chand hath ye patthar miTa na paenge

bahut baDa hai yahan KHandan shishe ka

main tez dhup se KHud ko bachane pahuncha tha

nasib dekho mila saeban shishe ka

hasin chand se chehre ko ru-ba-ru rakh kar

wo aaj toD gaya hai guman shishe ka

mere qabile ka sardar jab hua andha

miTa qabile se har ek nishan shishe ka

karoDon logon ke sar par nahin hai chhat lekin

bana raha hai wo hindostan shishe ka

huzur aap ne kaghaz ke phul rakkhe hain

kahan se lae mahak phul-dan shishe ka

sadaqaton ki shahadat ke nam par 'aKHlaq'

qadam-qadam pe hua imtihan shishe ka