bandish-e-alfaz hi se shairi hoti nahin

bandish-e-alfāz hī se shā.irī hotī nahīñ

sirf jī lene se jaise zindagī hotī nahīñ

shā.irī kaifiyyat-e-jazb-o-junūñ kā naam hai

ye na ho to shā.irī phir shā.irī hotī nahīñ

jo bhī ho lekin hamāre vāste ye shā.irī

parda-dār-e-rāz-hā-e-zindagī hotī nahīñ

garmi-e-jazbāt meñ imkāñ hasīñ dhoke kā hai

dil kī chingārī faroġh-e-dā.imī hotī nahīñ

paak hotā hai junūn-o-justujū se rāzdāñ

rāz-dānī be-niyāz-e-āgahī hotī nahīñ

muḳhtalif ik dūsre se haiñ haqīqat aur majāz

kūcha-e-mahbūb ka.aba kī galī hotī nahīñ

bandish-e-alfaz hi se shairi hoti nahin

sirf ji lene se jaise zindagi hoti nahin

shairi kaifiyyat-e-jazb-o-junun ka nam hai

ye na ho to shairi phir shairi hoti nahin

jo bhi ho lekin hamare waste ye shairi

parda-dar-e-raaz-ha-e-zindagi hoti nahin

garmi-e-jazbaat mein imkan hasin dhoke ka hai

dil ki chingari farogh-e-daimi hoti nahin

pak hota hai junun-o-justuju se raazdan

raaz-dani be-niyaz-e-agahi hoti nahin

muKHtalif ek dusre se hain haqiqat aur majaz

kucha-e-mahbub kaba ki gali hoti nahin