baqa ki fikr karo KHud hi zindagi ke liye

baqā kī fikr karo ḳhud hī zindagī ke liye

zamāna kuchh nahīñ kartā kabhī kisī ke liye

nahīñ hai vaqf agar zindagī kisī ke liye

to har qadam pe tabāhī hai aadmī ke liye

kamāl jab hai ki us raah meñ charāġh jalāo

jo muddatoñ se tarastī hai raushnī ke liye

fareb-e-shauq fareb-e-nazar fareb-e-ḳhayāl

hazār daam haiñ ik zauq-e-āgahī ke liye

tumhārī bazm meñ kyā shikva-e-ġham-e-hastī

yahāñ to saañs bhī ne.amat hai zindagī ke liye

guloñ ne aag lagā dī tamām gulshan meñ

zarā sī der ke lutf-e-shaguftagī ke liye

koī to baat tire āstāñ meñ hai varna

hazār dar the mire zauq-e-bandagī ke liye

vahāñ havāoñ ke ruḳh bhī nigāh meñ rakhnā

jahāñ charāġh jalāte ho raushnī ke liye

na jaane kitnī bahāroñ kā ḳhuuñ huā hogā

nigār-e-ḳhāna-ālam kī dilkashī ke liye

faroġh-e-bāda nahīñ hai harīf-e-tishna-labī

kuchh aur laao mire zauq-e-mai-kashī ke liye

nigāh-e-barq hai jab se mire chaman kī taraf

duā.eñ maañg rahā huuñ kalī kalī ke liye

jo un ke ġham se ho nisbat to har jahān meñ 'kaif'

masarratoñ kā ḳhazāna hai aadmī ke liye

baqa ki fikr karo KHud hi zindagi ke liye

zamana kuchh nahin karta kabhi kisi ke liye

nahin hai waqf agar zindagi kisi ke liye

to har qadam pe tabahi hai aadmi ke liye

kamal jab hai ki us rah mein charagh jalao

jo muddaton se tarasti hai raushni ke liye

fareb-e-shauq fareb-e-nazar fareb-e-KHayal

hazar dam hain ek zauq-e-agahi ke liye

tumhaari bazm mein kya shikwa-e-gham-e-hasti

yahan to sans bhi neamat hai zindagi ke liye

gulon ne aag laga di tamam gulshan mein

zara si der ke lutf-e-shaguftagi ke liye

koi to baat tere aastan mein hai warna

hazar dar the mere zauq-e-bandagi ke liye

wahan hawaon ke ruKH bhi nigah mein rakhna

jahan charagh jalate ho raushni ke liye

na jaane kitni bahaaron ka KHun hua hoga

nigar-e-KHana-alam ki dilkashi ke liye

farogh-e-baada nahin hai harif-e-tishna-labi

kuchh aur lao mere zauq-e-mai-kashi ke liye

nigah-e-barq hai jab se mere chaman ki taraf

duaen mang raha hun kali kali ke liye

jo un ke gham se ho nisbat to har jahan mein 'kaif'

masarraton ka KHazana hai aadmi ke liye