barabar KHwab se chehron ki hijrat dekhte rahna

barābar ḳhvāb se chehroñ kī hijrat dekhte rahnā

guzar chukne pe bhī vo shām-e-rahlat dekhte rahnā

dhanak kī bārisheñ barfāb shahroñ par nahīñ hotīñ

yahāñ phūloñ kā rasta umr bhar mat dekhte rahnā

kitāboñ kī tahoñ meñ DhūñDhnā nā-dīda ashyā kā

palaT kar phir koī ḳhālī ibārat dekhte rahnā

hujūm-e-shahr ke sannāTe meñ gum-sum vo Tiila sā

usī ko aate jaate be-zarūrat dekhte rahnā

jise maiñ chhū nahīñ saktā dikhā.ī kyuuñ vo detā hai

farishtoñ jaisī bas merī ibādat dekhte rahnā

'musavvir' kuchh na kahne kā ye dukh bhī saḳht zālim hai

talab kar legī lafzoñ kī adālat dekhte rahnā

barabar KHwab se chehron ki hijrat dekhte rahna

guzar chukne pe bhi wo sham-e-rahlat dekhte rahna

dhanak ki barishen barfab shahron par nahin hotin

yahan phulon ka rasta umr bhar mat dekhte rahna

kitabon ki tahon mein DhunDhna na-dida ashya ka

palaT kar phir koi KHali ibarat dekhte rahna

hujum-e-shahr ke sannaTe mein gum-sum wo Tila sa

usi ko aate jate be-zarurat dekhte rahna

jise main chhu nahin sakta dikhai kyun wo deta hai

farishton jaisi bas meri ibaadat dekhte rahna

'musawwir' kuchh na kahne ka ye dukh bhi saKHt zalim hai

talab kar legi lafzon ki adalat dekhte rahna