barahna-pa hai bhaTakti ruhon ko dudh deti hai palti hai

barahna-pā hai bhaTaktī rūhoñ ko duudh detī hai pāltī hai

phir un ke jismoñ pe qahqahe pheñktī hai chehre udāstī hai

darūn-e-dil aisā lag rahā hai koī balā hai baḌī balā hai

jo saañs letī hai aah bhartī hai baat karne pe mārtī hai

ajiib mantiq kī pārsā hai ye hijr kī shab ye hijr kī shab

lipaT ke sotī hai kis ke pahlū se kis ke pahlū meñ jāgtī hai

maiñ ḳhvāb ko chīrne kā ḳhanjar chhupā ke bistar pe leTtā huuñ

pata nahīñ kis kī muḳhbirī par ye raat jebeñ khañgāltī hai

hamāre paañv bhī jhaḌ rahe haiñ qayāmat-e-qaid-e-zindagī meñ

tumhārī aahoñ kī sho.alagī bhī hamārī zanjīr kāTtī hai

dhaḌām se gir paḌī thī mujh par ajiib hai.at kī sir kaTī ruuh

ye fāhisha ab na so rahī hai na ūñghtī hai na khāñstī hai

barahna-pa hai bhaTakti ruhon ko dudh deti hai palti hai

phir un ke jismon pe qahqahe phenkti hai chehre udasti hai

darun-e-dil aisa lag raha hai koi bala hai baDi bala hai

jo sans leti hai aah bharti hai baat karne pe marti hai

ajib mantiq ki parsa hai ye hijr ki shab ye hijr ki shab

lipaT ke soti hai kis ke pahlu se kis ke pahlu mein jagti hai

main KHwab ko chirne ka KHanjar chhupa ke bistar pe leTta hun

pata nahin kis ki muKHbiri par ye raat jeben khangalti hai

hamare panw bhi jhaD rahe hain qayamat-e-qaid-e-zindagi mein

tumhaari aahon ki shoalagi bhi hamari zanjir kaTti hai

dhaDam se gir paDi thi mujh par ajib haiat ki sir kaTi ruh

ye fahisha ab na so rahi hai na unghti hai na khansti hai