barahna shaKHon pe kab faKHtaen aati hain

barahna shāḳhoñ pe kab fāḳhtā.eñ aatī haiñ

maiñ vo shajar huuñ ki jis meñ balā.eñ aatī haiñ

ye kaun mere lahū meñ diye jalātā hai

badan se chhan ke ye kaisī shuā.eñ aatī haiñ

mujhe sanad kī zarūrat nahīñ hai nāqid se

mirī ġhazal pe hasīnoñ kī raa.eñ aatī haiñ

ḳhudā se jin kā ta.alluq nahīñ bachā koī

safar meñ yaad unheñ bhī duā.eñ aatī haiñ

unheñ ḳhabar hī nahīñ kab kā bujh chukā huuñ maiñ

mirī talāsh meñ ab tak havā.eñ aatī haiñ

maiñ chīḳhtā huuñ kisī dasht-e-be-amāñ meñ 'salīm'

phir us ke baa'd musalsal sadā.eñ aatī haiñ

barahna shaKHon pe kab faKHtaen aati hain

main wo shajar hun ki jis mein balaen aati hain

ye kaun mere lahu mein diye jalata hai

badan se chhan ke ye kaisi shuaen aati hain

mujhe sanad ki zarurat nahin hai naqid se

meri ghazal pe hasinon ki raen aati hain

KHuda se jin ka talluq nahin bacha koi

safar mein yaad unhen bhi duaen aati hain

unhen KHabar hi nahin kab ka bujh chuka hun main

meri talash mein ab tak hawaen aati hain

main chiKHta hun kisi dasht-e-be-aman mein 'salim'

phir us ke ba'd musalsal sadaen aati hain