bargashta-talai ka tamasha dikhaun main

bargashta-tāla.ī kā tamāshā dikhā.ūñ maiñ

ghar ko lage jo aag to paanī bujhā.ūñ maiñ

jins-e-girāñ-bahā kā ḳharīdār kaun hai

yaktā nahīñ ilāhī jo chorī hī jā.ūñ maiñ

lāla-ruḳhoñ ke husn kā bhūkā huuñ is qadar

dil ho na sair laakh agar daaġh khā.ūñ maiñ

āñkheñ mirī kare jo munavvar jamāl-e-yār

ghē ke charāġh tuur ke uupar jalā.ūñ maiñ

murde kī tarah sote haiñ kaise mire nasīb

Thokar se pā-e-yār ke un ko jagā.ūñ maiñ

bosa mile kamāñ kā jo abrū-e-yār kī

mehrāb-e-bait-e-ka.aba meñ chillā chaḌhā.ūñ maiñ

jī chāhtā hai shauq-e-shahādat meñ qabl-e-marg

banvā ke qabr-e-lāla ko us par lagā.ūñ maiñ

ghar meñ jo mujh faqīr ke vo shāh-e-husn aa.e

mizhgāñ ke boriye jo khaḌe haiñ bichhā.ūñ maiñ

kāñTā sukhā ke hijr ne har-chand kar diyā

vo gul-badan mile to na phūlā samā.ūñ maiñ

tum to ġharīb-ḳhāne meñ aa.e na ek roz

farmā.iye to shab ko kisī vaqt aa.uuñ maiñ

bārīk-bīñ huuñ shā.er-e-nāzuk-ḳhayāl huuñ

mazmūñ jahāñ kamar kā mile bāñdh lā.ūñ maiñ

'ātish' ġhulām-e-sāqi-e-kausar huuñ chāhiye

firdaus kā khulā huā darvāza pā.ūñ maiñ

bargashta-talai ka tamasha dikhaun main

ghar ko lage jo aag to pani bujhaun main

jins-e-giran-baha ka KHaridar kaun hai

yakta nahin ilahi jo chori hi jaun main

lala-ruKHon ke husn ka bhuka hun is qadar

dil ho na sair lakh agar dagh khaun main

aankhen meri kare jo munawwar jamal-e-yar

ghee ke charagh tur ke upar jalaun main

murde ki tarah sote hain kaise mere nasib

Thokar se pa-e-yar ke un ko jagaun main

bosa mile kaman ka jo abru-e-yar ki

mehrab-e-bait-e-kaba mein chilla chaDhaun main

ji chahta hai shauq-e-shahadat mein qabl-e-marg

banwa ke qabr-e-lala ko us par lagaun main

ghar mein jo mujh faqir ke wo shah-e-husn aae

mizhgan ke boriye jo khaDe hain bichhaun main

kanTa sukha ke hijr ne har-chand kar diya

wo gul-badan mile to na phula samaun main

tum to gharib-KHane mein aae na ek roz

farmaiye to shab ko kisi waqt aaun main

barik-bin hun shaer-e-nazuk-KHayal hun

mazmun jahan kamar ka mile bandh laun main

'atish' ghulam-e-saqi-e-kausar hun chahiye

firdaus ka khula hua darwaza paun main