barpa hai ek qayamat mere dil-e-hazin mein

barpā hai ik qayāmat mere dil-e-hazīñ meñ

aaheñ chhipī huī haiñ andāz-e-sharmgīñ meñ

aao aur aa ke apne ruḳh se naqāb uThā do

phir zauq-e-sajda-rezī betāb hai jabīñ meñ

allāh re hamārī ye mahviyat kā aalam

gum ho ke rah ga.e haiñ ik jalva-e-hasīñ meñ

jannat kī bhī adā.eñ kausar kī bhī fazā.eñ

kyā kuchh nazar na aaya is chashm-e-nāznīñ meñ

ra.anā.iyoñ kā aalam rangīniyoñ kī duniyā

har chiiz tairtī hai ik jām-e-ātishīñ meñ

merī nigāh-o-dil meñ ab vo samā ga.e haiñ

maiñ jaise kho gayā huuñ jalvoñ kī sarzamīñ meñ

dīvāngān-e-ġham bhī hushiyār kis qadar haiñ

ḳhud phaaḌ kar garebāñ siite haiñ āstīñ meñ

us kī nazar to mil kar vāpas bhī ho chukī hai

ik dard rah gayā hai lekin dil-e-hazīñ meñ

barpa hai ek qayamat mere dil-e-hazin mein

aahen chhipi hui hain andaz-e-sharmgin mein

aao aur aa ke apne ruKH se naqab uTha do

phir zauq-e-sajda-rezi betab hai jabin mein

allah re hamari ye mahwiyat ka aalam

gum ho ke rah gae hain ek jalwa-e-hasin mein

jannat ki bhi adaen kausar ki bhi fazaen

kya kuchh nazar na aaya is chashm-e-naznin mein

ranaiyon ka aalam ranginiyon ki duniya

har chiz tairti hai ek jam-e-atishin mein

meri nigah-o-dil mein ab wo sama gae hain

main jaise kho gaya hun jalwon ki sarzamin mein

diwangan-e-gham bhi hushiyar kis qadar hain

KHud phaD kar gareban site hain aastin mein

us ki nazar to mil kar wapas bhi ho chuki hai

ek dard rah gaya hai lekin dil-e-hazin mein