barq-e-ruKHsar-e-yar phir chamki

barq-e-ruḳhsār-e-yār phir chamkī

is chaman kī bahār phir chamkī

tū ne phir is ko saan par rakkhā

tere ḳhanjar kī dhaar phir chamkī

mere girye se āb-o-tāb aayā

sūrat-e-rozgār phir chamkī

ḳhūn-e-āshiq se vo zah-e-dāman

dam-e-shamshīr vaar phir chamkī

dekhiyo paañv rakh diyā kis ne

aaj kyuuñ nok-e-ḳhār phir chamkī

vo jo ik Tiis sī hai dil meñ mire

rah ke be-iḳhtiyār phir chamkī

'mus.hafī' kī jo tū ne dar-rezī

shā.erī terī yaar phir chamkī

barq-e-ruKHsar-e-yar phir chamki

is chaman ki bahaar phir chamki

tu ne phir is ko san par rakkha

tere KHanjar ki dhaar phir chamki

mere girye se aab-o-tab aaya

surat-e-rozgar phir chamki

KHun-e-ashiq se wo zah-e-daman

dam-e-shamshir war phir chamki

dekhiyo panw rakh diya kis ne

aaj kyun nok-e-KHar phir chamki

wo jo ek Tis si hai dil mein mere

rah ke be-iKHtiyar phir chamki

'mushafi' ki jo tu ne dar-rezi

shaeri teri yar phir chamki