barq ke sae mein kaif-e-ashiyan samjha tha main

barq ke saa.e meñ kaif-e-āshiyāñ samjhā thā maiñ

har ma.āl-e-rañg-o-bū ko gulsitāñ samjhā thā maiñ

har numūd-e-ishq meñ soz-e-nihāñ samjhā thā meñ

shāhkār-e-husn ko ātash-bajāñ samjhā thā maiñ

ranj-o-ġham se irtibāt-e-jism-o-jāñ samjhā thā maiñ

hasti-e-nākām ko ḳhvāb-e-girāñ samajhtā thā maiñ

ishq-e-fānī ko nishāt-e-jāvedāñ samjhā thā maiñ

zindagī ke raaz ko ab tak kahāñ samjhā thā maiñ

dil ke har parde se aatī thiiñ sadā.eñ dard kī

barbat-e-hastī pe tum ko naġhma-ḳhvāñ samjhā thā maiñ

kyā ḳhabar thī dil hī merā āstān-e-nāz hai

dil ko ab tak be-niyāz-e-āstāñ samjhā thā maiñ

is liye maiñ iltifāt-e-ḳhās se mahrūm huuñ

joshash-e-sa.ī-e-talab ko rā.egāñ samjhā thā maiñ

ai junūn-e-justujū rāh-e-talab meñ baar baar

har ġhubār-e-kārvāñ ko kārvāñ samjhā thā maiñ

sun rahā thā kaifiyāt-e-zindagī ke vāqi'āt

un ke afsāne ko apnī dāstāñ samjhā thā maiñ

be-niyāz-e-bandagī-e-shauq thī merī ḳhudī

be-ḳhudī meñ ehtirām-e-āstāñ samjhā thā maiñ

is qadar Duubā huā thā e'tibār-e-shauq meñ

har fareb-e-āshiyāñ ko āshiyāñ samjhā thā maiñ

ġhuncha-o-gul hī pe kyā mauqūf thā rāz-e-jamāl

zarre zarre ko chaman ke rāz-dāñ samjhā thā maiñ

dil kī har tafsīr par ḳhāmoshiyāñ detī thiiñ daad

anjuman vāloñ ko mahv-e-dāstāñ samjhā thā maiñ

aap kī zāt-e-girāmī kā na 'irfāñ kar sakā

aap ko lekin sharīk-e-kārvāñ samjhā thā maiñ

jab shikast-e-sāz-e-dil kī 'zeb' jhankāreñ sunīñ

dil kī har dhaḌkan pe tum ko naġhma-ḳhvāñ samjhā thā maiñ

barq ke sae mein kaif-e-ashiyan samjha tha main

har maal-e-rang-o-bu ko gulsitan samjha tha main

har numud-e-ishq mein soz-e-nihan samjha tha mein

shahkar-e-husn ko aatash-bajaan samjha tha main

ranj-o-gham se irtibaat-e-jism-o-jaan samjha tha main

hasti-e-nakaam ko KHwab-e-giran samajhta tha main

ishq-e-fani ko nishat-e-jawedan samjha tha main

zindagi ke raaz ko ab tak kahan samjha tha main

dil ke har parde se aati thin sadaen dard ki

barbat-e-hasti pe tum ko naghma-KHwan samjha tha main

kya KHabar thi dil hi mera aastan-e-naz hai

dil ko ab tak be-niyaz-e-astan samjha tha main

is liye main iltifat-e-KHas se mahrum hun

joshash-e-sai-e-talab ko raegan samjha tha main

ai junun-e-justuju rah-e-talab mein bar bar

har ghubar-e-karwan ko karwan samjha tha main

sun raha tha kaifiyat-e-zindagi ke waqi'at

un ke afsane ko apni dastan samjha tha main

be-niyaz-e-bandagi-e-shauq thi meri KHudi

be-KHudi mein ehtiram-e-astan samjha tha main

is qadar Duba hua tha e'tibar-e-shauq mein

har fareb-e-ashiyan ko aashiyan samjha tha main

ghuncha-o-gul hi pe kya mauquf tha raaz-e-jamal

zarre zarre ko chaman ke raaz-dan samjha tha main

dil ki har tafsir par KHamoshiyan deti thin dad

anjuman walon ko mahw-e-dastan samjha tha main

aap ki zat-e-girami ka na 'irfan kar saka

aap ko lekin sharik-e-karwan samjha tha main

jab shikast-e-saz-e-dil ki 'zeb' jhankaren sunin

dil ki har dhaDkan pe tum ko naghma-KHwan samjha tha main