barq ko us par abas girne ki hain tayyariyan

barq ko us par 'abas girne kī haiñ tayyāriyāñ

barg-e-gul hī āshiyāñ ko apne hai chiñgāriyāñ

ahd-e-tiflī meñ bhī thā maiñ bas-ki saudā.ī-mizāj

beḌiyāñ minnat kī bhī pahnīñ to maiñ ne bhāriyāñ

maut ke aate hī ham ko ḳhud-baḳhud niiñd aa ga.ī

kyā usī kī yaad meñ karte the shab-bedāriyāñ

ai ḳhat us ke gore gāloñ par ye tū ne kyā kiyā

chāñdnī rāteñ yakāyak ho ga.iiñ añdhyāriyāñ

ḳhanda-e-gul se sadā-e-nāla aatī hai mujhe

ḳhūn-e-bulbul se magar sīñchī ga.ī haiñ kyāriyāñ

ḳhaak kā putlā bhī aahan se hai saḳhtī meñ fuzūñ

jism par insāñ ke talvāreñ huī haiñ āriyāñ

ḳhauf-e-ḳhāliq hai vagarna mohtasib kyā maal hai

ḳhān-e-qāzī meñ jā kar kījiye mai-ḳhvāriyāñ

kuchh hamīñ ḳhālī nahīñ karte haiñ ye dair-e-ḳharāb

phir ga.e haiñ yaar yūñhī apnī apnī bāriyāñ

hukm kar 'ātish' ki bāzār-e-mohabbat band ho

ab kareñ TaTpūjiye garm apnī dūkāñ-dāriyāñ

barq ko us par 'abas girne ki hain tayyariyan

barg-e-gul hi aashiyan ko apne hai chingariyan

ahd-e-tifli mein bhi tha main bas-ki saudai-mizaj

beDiyan minnat ki bhi pahnin to main ne bhaariyan

maut ke aate hi hum ko KHud-baKHud nind aa gai

kya usi ki yaad mein karte the shab-bedariyan

ai KHat us ke gore galon par ye tu ne kya kiya

chandni raaten yakayak ho gain andhyariyan

KHanda-e-gul se sada-e-nala aati hai mujhe

KHun-e-bulbul se magar sinchi gai hain kyariyan

KHak ka putla bhi aahan se hai saKHti mein fuzun

jism par insan ke talwaren hui hain aariyan

KHauf-e-KHaliq hai wagarna mohtasib kya mal hai

KHan-e-qazi mein ja kar kijiye mai-KHwariyan

kuchh hamin KHali nahin karte hain ye dair-e-KHarab

phir gae hain yar yunhi apni apni bariyan

hukm kar 'atish' ki bazar-e-mohabbat band ho

ab karen TaTpujiye garm apni dukan-dariyan