bas ek hi kaifiyyat-e-dil subh-o-masa hai

bas ek hī kaifiyyat-e-dil sub.h-o-masā hai

har lamha mirī 'umr kā zanjīr-ba-pā hai

maiñ shahr ko kahtā hoñ bayābāñ ki yahāñ bhī

saaya tirī dīvār kā kab sar pe paḌā hai

hai vaqt ki kahtā hai rukūñgā na maiñ ik pal

tū hai ki abhī baat mirī tol rahā hai

maiñ bazm se ḳhākistar-e-dil le ke chalā huuñ

aur sāmne tanhā.ī ke sahrā kī havā hai

āvāz kā tesha hai na ḳhāmosh takallum

taalā jo zabāñ par thā vo ab dil pe paḌā hai

maiñ saath liye phirtā huuñ sāmān-e-halākat

rag rag meñ mirī zahr-e-vafā dauḌ rahā hai

kyā kyā haiñ tamannā.eñ dil-e-ḳhāk-basar meñ

ye qāfila vīrāne meñ kyuuñ Thahrā huā hai

bas ek hi kaifiyyat-e-dil subh-o-masa hai

har lamha meri 'umr ka zanjir-ba-pa hai

main shahr ko kahta hon bayaban ki yahan bhi

saya teri diwar ka kab sar pe paDa hai

hai waqt ki kahta hai rukunga na main ek pal

tu hai ki abhi baat meri tol raha hai

main bazm se KHakistar-e-dil le ke chala hun

aur samne tanhai ke sahra ki hawa hai

aawaz ka tesha hai na KHamosh takallum

tala jo zaban par tha wo ab dil pe paDa hai

main sath liye phirta hun saman-e-halakat

rag rag mein meri zahr-e-wafa dauD raha hai

kya kya hain tamannaen dil-e-KHak-basar mein

ye qafila virane mein kyun Thahra hua hai