bas ek zara KHayal hamein dosti ka hai

bas ik zarā ḳhayāl hameñ dostī kā hai

varna bahut malāl tirī be-ruḳhī kā hai

tū bhī hai zindagī meñ kahīñ hai mujhe yaqīn

yā ye bhī ehtimāl mirī sādgī kā hai

hai aaj jism-o-jāñ pe tirī yaad kī thakan

ik ḳhauf mere dil ko kisī an-kahī kā hai

vāqif huuñ tere dard se lekin mire habīb

ab to ye mas.ala bhī mirī zindagī kā hai

lab haiñ ḳhamosh zabt se lekin ye mas.ala

āñkhoñ meñ terī yaad se phailī namī kā hai

rishtoñ ke darmiyān bahut mutma.in huuñ maiñ

is zindagī meñ dard to terī kamī kā hai

ye din ye shab ye phuul se mausam tire baġhair

kaise guzar rahe haiñ gila bas isī kā hai

bas ek zara KHayal hamein dosti ka hai

warna bahut malal teri be-ruKHi ka hai

tu bhi hai zindagi mein kahin hai mujhe yaqin

ya ye bhi ehtimal meri sadgi ka hai

hai aaj jism-o-jaan pe teri yaad ki thakan

ek KHauf mere dil ko kisi an-kahi ka hai

waqif hun tere dard se lekin mere habib

ab to ye masala bhi meri zindagi ka hai

lab hain KHamosh zabt se lekin ye masala

aankhon mein teri yaad se phaili nami ka hai

rishton ke darmiyan bahut mutmain hun main

is zindagi mein dard to teri kami ka hai

ye din ye shab ye phul se mausam tere baghair

kaise guzar rahe hain gila bas isi ka hai