bas isi had tak jahan-e-rang-o-bu achchha laga

bas isī had tak jahān-e-rang-o-bū achchhā lagā

ik javān-e-sarv-qad ik ḳhūb-rū achchhā lagā

zāhidoñ kī ruuh meñ jab jhāñk kar dekhā to phir

ḳhirqa-o-sajjāda se apnā subū achchhā lagā

guftugū meñ sard-mehrī aañkh meñ lutf-o-karam

us kā ye andāz mere rū-ba-rū achchhā lagā

jab nazar Daalī kitāb-e-zindagī par ġhaur se

is meñ bas ik lamha-e-teġh-o-gulū achchhā lagā

apnī fitrat meñ hai darveshī so ham ko mai-kasho

sāġhar-e-jamshed se apnā kadū achchhā lagā

kyā kare apnī tabī.at kī koī uftād ko

dosto vo dushman-e-jāñ vo adū achchhā lagā

jāñ-nisāroñ kī kamī koī na thī 'jābir' yahāñ

teġh-e-qātil ko magar merā lahū achchhā lagā

bas isi had tak jahan-e-rang-o-bu achchha laga

ek jawan-e-sarw-qad ek KHub-ru achchha laga

zahidon ki ruh mein jab jhank kar dekha to phir

KHirqa-o-sajjada se apna subu achchha laga

guftugu mein sard-mehri aankh mein lutf-o-karam

us ka ye andaz mere ru-ba-ru achchha laga

jab nazar Dali kitab-e-zindagi par ghaur se

is mein bas ek lamha-e-tegh-o-gulu achchha laga

apni fitrat mein hai darweshi so hum ko mai-kasho

saghar-e-jamshed se apna kadu achchha laga

kya kare apni tabiat ki koi uftad ko

dosto wo dushman-e-jaan wo adu achchha laga

jaan-nisaron ki kami koi na thi 'jabir' yahan

tegh-e-qatil ko magar mera lahu achchha laga