bas KHala se hi sadaen huin rad

bas ḳhalā se hī sadā.eñ huiiñ rad

is liye saarī duā.eñ huiiñ rad

ho ga.iiñ saarī kitābeñ raddī

ilm-o-dānish kī kathā.eñ huiiñ rad

vo jo phokaT meñ jiye aur mare

un ke jism aur chitāeñ huiiñ rad

mez par pesh huī jab darḳhvāst

habs daftar meñ havā.eñ huiiñ rad

shaam par shām-e-abad thī bhaa.ī

kitnī bahnoñ kī ridā.eñ huiiñ rad

ham ne jab tol ghaTāyā sāhab

apnī qismat kī ghaTā.eñ huiiñ rad

ishq meñ radd-o-badal thā mushkil

husn kī kitnī adā.eñ huiiñ rad

block hone ke the imkān bahut

ḳhat pahuñchte hī ḳhatā.eñ huiiñ rad

ḳhair kī ḳhair nahīñ thī 'asvad'

aur na badle meñ balā.eñ huiiñ rad

bas KHala se hi sadaen huin rad

is liye sari duaen huin rad

ho gain sari kitaben raddi

ilm-o-danish ki kathaen huin rad

wo jo phokaT mein jiye aur mare

un ke jism aur chitaen huin rad

mez par pesh hui jab darKHwast

habs daftar mein hawaen huin rad

sham par sham-e-abad thi bhai

kitni bahnon ki ridaen huin rad

hum ne jab tol ghaTaya sahab

apni qismat ki ghaTaen huin rad

ishq mein radd-o-badal tha mushkil

husn ki kitni adaen huin rad

block hone ke the imkan bahut

KHat pahunchte hi KHataen huin rad

KHair ki KHair nahin thi 'aswad'

aur na badle mein balaen huin rad