بس خیال آتا ہے اپنے عشق کی تشہیر کا

بس خیال آتا ہے اپنے عشق کی تشہیر کا

ورنہ دنیا دیکھتی جلوہ دل دلگیر کا

بیکسی کرب و تنفر ڈھونگ ہے تفکیر کا

میرا ہونا خود مخالف ہے تری تنکیر کا

حرکتوں پر ہی اگر ہے برکتوں کا انحصار

کیوں تماشا دیکھتے بیٹھے رہیں تقدیر کا

سانپ بن کر لوٹتی ہیں خواہشیں دل پر مرے

مرثیہ لکھتا نہیں میں سستیٔ تدبیر کا

دعوت صد عیش ادھر اور فتنۂ گیسو ادھر

اس کی انگڑائی ہے نقشہ وادئ کشمیر کا

سیل غم میں ہی سہی نکلیں تو دل سے حسرتیں

شکریہ یادوں کا اس فن کا تری تصویر کا

تم اسے دیوانگی سمجھو کہ اب سادہ دلی

منتظر ہے دل تمہاری ہی نظر کے تیر کا

دل کے جس ٹکڑے کو دل سے چاہتا تھا سرفرازؔ

ایک دستاویز ہے اب غیر کی جاگیر کا