bas teri had se tujhe aage rasai nahin di

bas tirī had se tujhe aage rasā.ī nahīñ dī

maiñ ne gaalī to koī ai mire bhaa.ī nahīñ dī

mujhe har fikr se āzād samajhne vaale

mere māthe kī shikan tujh ko dikhā.ī nahīñ dī

dil meñ ik shor uThā haath chhuḌāne se tire

der tak phir koī āvāz sunā.ī nahīñ dī

phuul kāḌhe haiñ mire talvoñ pe vahshat ne mirī

tapte sahrā ne mujhe ābla-pā.ī nahīñ dī

ek-dūje se yuuñ vābasta hue ham donoñ

maiñ ne chāhā nahīñ us ne bhī rihā.ī nahīñ dī

vasl aayā thā tire hijr kā saudā karne

ishq kī ham ne magar pahlī kamā.ī nahīñ dī

haath kyā soch ke khīñchā hai sitam se us ne

maiñ ne zaḳhmoñ kī to 'zīshān' duhā.ī nahīñ dī

bas teri had se tujhe aage rasai nahin di

main ne gali to koi ai mere bhai nahin di

mujhe har fikr se aazad samajhne wale

mere mathe ki shikan tujh ko dikhai nahin di

dil mein ek shor uTha hath chhuDane se tere

der tak phir koi aawaz sunai nahin di

phul kaDhe hain mere talwon pe wahshat ne meri

tapte sahra ne mujhe aabla-pai nahin di

ek-duje se yun wabasta hue hum donon

main ne chaha nahin us ne bhi rihai nahin di

wasl aaya tha tere hijr ka sauda karne

ishq ki hum ne magar pahli kamai nahin di

hath kya soch ke khincha hai sitam se us ne

main ne zaKHmon ki to 'zishan' duhai nahin di