bas ye hua ki rishton ke sab hath kaT gae

bas ye huā ki rishtoñ ke sab haath kaT ga.e

ham log apne-āp hī aapas meñ baT ga.e

āsār-e-mumkināt the jitne vo ghaT ga.e

sūraj nikal ke aayā to kohre bhī chhaT ga.e

ye buz-dilī thī apnī ki kuchh bhī nahīñ kahā

hone diyā jo honā thā raste se haT ga.e

un se to jā ke milnā bhī dushvār ho gayā

masrūfiyat ke naam pe ham bhī simaT ga.e

ham kyā kaheñ ki kaise himāqat ye ho ga.ī

jo thā sabaq bhulāne kā us ko bhī raT ga.e

dīvār-o-dar se ab bhī rifāqat vahī rahī

tanhā.iyoñ meñ aa.e to un se lipaT ga.e

'ḳhurshīd' us pe sochiye kis kā qusūr hai

āsūdgī ke lamhe bhī aa kar palaT ga.e

bas ye hua ki rishton ke sab hath kaT gae

hum log apne-ap hi aapas mein baT gae

aasar-e-mumkinat the jitne wo ghaT gae

suraj nikal ke aaya to kohre bhi chhaT gae

ye buz-dili thi apni ki kuchh bhi nahin kaha

hone diya jo hona tha raste se haT gae

un se to ja ke milna bhi dushwar ho gaya

masrufiyat ke nam pe hum bhi simaT gae

hum kya kahen ki kaise himaqat ye ho gai

jo tha sabaq bhulane ka us ko bhi raT gae

diwar-o-dar se ab bhi rifaqat wahi rahi

tanhaiyon mein aae to un se lipaT gae

'KHurshid' us pe sochiye kis ka qusur hai

aasudgi ke lamhe bhi aa kar palaT gae