basae jate hain ahl-e-junun se virane

basā.e jaate haiñ ahl-e-junūñ se vīrāne

rumūz-e-mamlikat-e-husn koī kyā jaane

ye kis kī bazm hai ārāsta ḳhudā jaane

nahīñ hai sham.a to kyoñ jal rahe haiñ parvāne

hai banda hone ke iz.hār par bashar majbūr

pa-e-sujūd baneñ masjideñ ki but-ḳhāne

na qais dasht meñ hai aur na koh meñ farhād

par un ke naam se guuñj uThte haiñ ye vīrāne

fuzūñ haiñ naġhma-e-bulbul se qahqahe gul ke

ki intizām-e-chaman ab kareñge dīvāne

dayār-e-ishq meñ barpā hai inqilāb-e-azīm

ye daur vo hai ki apne hue haiñ begāne

chhupā liyā ruḳh-e-anvar hinā.ī hāthoñ se

hamāre dil pe jo guzrī tirī balā jaane

sitam hazār hoñ zālim magar diloñ ko na toḌ

tire ḳhayāl se ābād haiñ ye kāshāne

vo hāl-e-ġham mirā ḳhud mujh se sun ke kahte haiñ

ki sun chuke haiñ ham aise hazār afsāne

hai bāda-noshī se mastoñ ko bād-e-marg bhī rabt

ki un kī ḳhaak se yaañ ban rahe haiñ paimāne

sanam se hāl-e-dil-e-zār kah to duuñ 'āġhā'

magar maiñ jā.ūñ kahāñ vo agar burā maane

basae jate hain ahl-e-junun se virane

rumuz-e-mamlikat-e-husn koi kya jaane

ye kis ki bazm hai aarasta KHuda jaane

nahin hai shama to kyon jal rahe hain parwane

hai banda hone ke izhaar par bashar majbur

pa-e-sujud banen masjiden ki but-KHane

na qais dasht mein hai aur na koh mein farhad

par un ke nam se gunj uThte hain ye virane

fuzun hain naghma-e-bulbul se qahqahe gul ke

ki intizam-e-chaman ab karenge diwane

dayar-e-ishq mein barpa hai inqilab-e-azim

ye daur wo hai ki apne hue hain begane

chhupa liya ruKH-e-anwar hinai hathon se

hamare dil pe jo guzri teri bala jaane

sitam hazar hon zalim magar dilon ko na toD

tere KHayal se aabaad hain ye kashane

wo haal-e-gham mera KHud mujh se sun ke kahte hain

ki sun chuke hain hum aise hazar afsane

hai baada-noshi se maston ko baad-e-marg bhi rabt

ki un ki KHak se yan ban rahe hain paimane

sanam se haal-e-dil-e-zar kah to dun 'agha'

magar main jaun kahan wo agar bura mane