basar ho yun ki har ek dard hadisa na lage

basar ho yuuñ ki har ik dard hādisa na lage

guzar bhī jaa.e koī ġham to vāqi.a na lage

kabhī na phuul se chehre pe gard-e-yās jame

ḳhudā kare ki use ishq kī havā na lage

nazar na aa.e mujhe husn ke sivā kuchh bhī

vo bevafā bhī agar hai to bevafā na lage

yahī duā hai vo jab ho jamāl se āgāh

libās-e-nāz bhī pahne to dūsrā na lage

vo mehrbāñ sā lage us kī kuchh karo tadbīr

ḳhafā bhī ho to mirī aañkh ko ḳhafā na lage

mile jo nūr-talab dil bhī yuuñ munavvar ho

mirā harīf bhī shām-o-sahar burā na lage

kahāñ se lā.ūñ 'hasan' guftugū meñ vo andāz

mirā kalām kisī ko bhī be-mazā na lage

basar ho yun ki har ek dard hadisa na lage

guzar bhi jae koi gham to waqia na lage

kabhi na phul se chehre pe gard-e-yas jame

KHuda kare ki use ishq ki hawa na lage

nazar na aae mujhe husn ke siwa kuchh bhi

wo bewafa bhi agar hai to bewafa na lage

yahi dua hai wo jab ho jamal se aagah

libas-e-naz bhi pahne to dusra na lage

wo mehrban sa lage us ki kuchh karo tadbir

KHafa bhi ho to meri aankh ko KHafa na lage

mile jo nur-talab dil bhi yun munawwar ho

mera harif bhi sham-o-sahar bura na lage

kahan se laun 'hasan' guftugu mein wo andaz

mera kalam kisi ko bhi be-maza na lage