basti basti kucha kucha shahr ko lala-fam kiya

bastī bastī kūcha kūcha shahr ko lāla-fām kiyā

dekho to in ahl-e-havas ne kaisā qatl-e-ām kiyā

ham to jahāñ ke sultānoñ se behtar us ko jaane haiñ

jis ne rūkhī sūkhī khā kar gudḌī meñ ārām kiyā

hirs-o-havā ke is jañgal meñ sirf vahī hai mard-e-jarī

nafs kā taa.ir jis insāñ ne ziist meñ zer-e-dām kiyā

qarya qarya ḳhaak uḌā kar shām-o-sahar durveshoñ ne

kaise kaise sañg-diloñ ko husn-e-amal se raam kiyā

zulm kī kālak ḳhuun se dho kar haq kī ḳhātir valiyoñ ne

log hamesha yaad rakheñge aisā ūñchā kaam kiyā

dekh ke nairañgī-e-gulshan ThanDe dil se socho to

kis ne faroġh-e-zulmat de kar nūr-e-sahar ko shaam kiyā

jab bhī royā sidq-e-dil se rab kī hub meñ zār-o-zār

ashk-e-'jalī' ne mere haq meñ rahmat ban kar kaam kiyā

basti basti kucha kucha shahr ko lala-fam kiya

dekho to in ahl-e-hawas ne kaisa qatl-e-am kiya

hum to jahan ke sultanon se behtar us ko jaane hain

jis ne rukhi sukhi kha kar gudDi mein aaram kiya

hirs-o-hawa ke is jangal mein sirf wahi hai mard-e-jari

nafs ka tair jis insan ne zist mein zer-e-dam kiya

qarya qarya KHak uDa kar sham-o-sahar durweshon ne

kaise kaise sang-dilon ko husn-e-amal se ram kiya

zulm ki kalak KHun se dho kar haq ki KHatir waliyon ne

log hamesha yaad rakhenge aisa uncha kaam kiya

dekh ke nairangi-e-gulshan ThanDe dil se socho to

kis ne farogh-e-zulmat de kar nur-e-sahar ko sham kiya

jab bhi roya sidq-e-dil se rab ki hub mein zar-o-zar

ashk-e-'jali' ne mere haq mein rahmat ban kar kaam kiya